• اكتب معانا
  • ماتنسناش
  • تابعنا
Home

الموضوع اللي جاي

جوجل عملت خدمة جديدة تحددلك مكان القِبلة

الموضوع اللي فات

"بحلم_مع_كريم_فريد" مسابقة تصوير على النت والجوايز كاميرات

7 وجوه جديدة خطفت قلوب الناس في رمضان

رمضان موسم ظهور المواهب الجديدة
بطيخ أكثر من هذا سوف يأتي، بطيخ أكثر من هذا سوف يمر

مع بداية سباق مسلسلات رمضان كل سنة، بيبدأ معاها سباق النجوم على خطف قلوب الناس، كل سنة في فنانين نجمهم يعلى وفنانين نجمهم يقع، كل واحد بيقدم أفضل ما عنده، وكل سنة بيبقى في فنانين بنشوفهم لأول مرة أو أول مرة ياخدوا مساحة عادلة يظهروا بيها موهبتهم، بيتنافسوا علي مين يخطف العين والقلب من مجرد طلتهم ع الشاشة، ممكن بابتسامة، أو اداء مقنع، أو يهلكنا من الضحك، كل واحد ليه طريقته، واحنا جبنالكم أبرز سبعة قدروا يخلونا نبتسم أو نتوجع بمجرد ما بيظهروا، يعني صدقناهم وحبيناهم.

مريم الخشت - لا تطفئ الشمس

بمجرد ما تعرف إنها بتدبلج أفلام كارتون، بتحس إن كل حاجة بقت منطقية، تعلق الأطفال بيها والكاريزما والشخصية الخفيفة اللي دخلت قلوب الناس بسهولة مع أول ظهور ليها في مسلسل "لاتطفئ الشمس"، مريم بتقوم بدور "شهيرة" قدام العبقري "محمد ممدوح"، لكن دي تعتبر تجربتها الأولى في التمثيل، بعد ما عملت دبلجة لأفلام كارتون كتير منها "كوليت" في كارتون "خلطبيطة بالصلصلة" و"نيتا" في فيلم كارتون "أخي الدب 2" و"ويندي" من فيلم كارتون "بيتر بان"، بالإضافة لكونها مذيعة برنامج "شركة المذيعين المتحدة" على إذاعة «ميجا اف ام» 92.7، بمجرد ظهورها في أي مشهد تلاقي نفسك بتبتسم بتلقائية، بنتمنى نشوفها في اعمال أكتر.

عارفة عبد الرسول - لا تطفئ الشمس

هي ممثلة وقاصة مصرية إسكندرانية، مش أول دور ليها، شاركت في أدوار كتير جدًا في مسلسلات وأفلام، لكنها أول مرة تاخد مساحة الدور الكبيرة دي من حسن حظنا. طالعة في المسلسل بشخصية "بسيمة" مربية الأولاد، وصديقة الأم "إقبال" اللي بتقوم بدورها الفنانة "مرفت أمين"، بس ماحدش بيعرف يسلم من لسانها، بمجرد ما بتتكلم لازم تلاقي ضحايا، لا بيعجبها الحال المايل ولا الظلم، واللي في قلبها على لسانها. عارف الكلام اللي بيبقى نفسك تقوله في موقف تبقى متضايق فيه وتقعد تندم بعده أنا ازاي ما قولتش الكلام ده؟ أهي "عارفة" الممثل الرسمي لكل الكلام اللي كان نفسك تقوله وماعرفتش.

محمود الليثي - لا تطفئ الشمس

لو أنت من متابعين SNL بالعربي، أكيد هتبقى عارفه وعارف إيفيهاته والأغاني اللي بيغنيها. "محمود" نجم كوميديا، خريج كلية الهندسة جامعة قناة السويس وأول تجاربه السينمائية كانت بدور في فيلم "فزاع"، لكن في مسلسل لا تطفئ الشمس طالع بدور دكتور "سعد" اللي بيحب "أفنان"، وبيقدر يشوف فيها اللي الناس وهي شخصيًا مش شايفاه، وبعد محاولات وصد كتير من"فوفة" في الآخر توافق على الخطوبة، لكن بتعذبه بسبب إنها مش قادرة تحب. دور درامي مختلف عن طبيعته الكوميدية، لكن بيفتحله سكة لأدوار متنوعة في المستقبل.

 

أسماء أبو اليزيد - هذا المساء

يمكن لو كانت المدرسة اللي درست فيها أسماء كان فيها مسرح أو فريق تمثيل، كنا شوفنا موهبة أسماء بدري شوية، أسماء خريجة "فنون جميلة" وبمجرد ما دخلتها وشافت فريق المسرح ابتدت معاه على طول. يعتبر دورها في هذا المساء من أوائل أدوارها في التليفزيون. عاملة دور"تقى" بنت بريئة بتقع ضحية لهاكر بيوصل لصور ليها على موبايلها، وبتخلينا نتعاطف كلنا مع أدائها الصادق ومحاولتها للانتحار بعد ما اتسدت الطرق كلها في وشها. تلقائية وبساطة وخفة خلت الناس تحبها وتتعلق بيها.

ملك عاصم - هذا المساء

حاملة لواء اللماضة في الجيل السينمائي الجديد، تحسها بتقكرك ب"دينا عبدالله " في الحفيد، مزيج من البراءة واللماضة وخفة الدم غير المفتعلة. ابتدت أول أدوارها مع الزعيم عادل إمام في مسلسل "صاحب السعادة" من 3 سنين. السنة دي طالعة في مسلسل "هذا المساء" بدور "نور" بنت "حامد" واللي بياخد باله منه "أحمد داود" بعد ما والدها دخل السجن. البنت خطفت الناس بخفة دمها وإنها بترخم على كل الناس وبتتلامض عليهم.

محمود حجازي - كفر دلهاب

على الرغم من إن دوره في مسلسل "كفر دلهاب" يعتبر دور صديق البطل بشكله التقليدي، دمه خفيف، حلنجي وابن نكتة، جدع لكن جبان علشان ما ينفعش يبقى أشجع من "يوسف الشريف" مثلا. أول ظهور ليه كان من خلال ايفيه قاله في إعلان "انتي تافهة ومشاكلك أتفه"،
قدر يضحك الناس ويخطف إعجابهم، بيشارك السنة دي في كذا مسلسل زي "كلبش" و"الجماعة 2" و"الحصان الأسود"، وكلهم أدوار جميلة ومهمة، لكن دوره الأبرز في كفر دلهاب هو اللي عرف الناس بيه وهيفتحله سكك اكتر في المستقبل.

مها نصار - واحة الغروب

مستحيل للي بيشوف المسلسل من غير ما يعرف مها إنه يعرف إن سمارها ده مكياج وإنه مش جزء من شخصيتها، مها اتوحدت مع الدور لدرجة إن ماحدش بقى فاكر شكلها الحقيقي، وبقى كل اللي فاكرينه السمرا الجميلة اللي سنانها شبه اللولي، تبتسم فتنور حياة "محمود عبد العظيم" وتتكلم فتونسه حكايتها وجمالها والحب اللي منور في عينيها. "مها" راقصة باليه وعارضة أزياء ودخلت منهم لعالم التمثيل، اتقدمت للدور ونجحت في كل الاختبارات وكان التحدي الأخير في السمار. كاملة أبو ذكرى قررت إن لو المكياج لونه ظبط مع لون بشرتها هتاخد الدور، ومن حسن حظنا إنه ظبط علشان كسبنا وجه جديد بعد ما كسبنا الأداء الجميل.

ركين سعد - واحة الغروب

خفة روح ودم غير طبيعية للفنانة الأردنية اللي أول مرة تمثل حاجة مصري، ركين طالعه بدور "مليكة"، واحدة من أكتر الشخصيات اللي كل اللي قروا الرواية كانوا مستنينها، كان مترشح للدور قبلها روبي وناهد السباعي، بس شخصيًا سعيد جدًا باختيار "ركين" علشان كسبنا وجه جديد جميل وموهوب.

الموضوع اللي جاي

جوجل عملت خدمة جديدة تحددلك مكان القِبلة

الموضوع اللي فات

"بحلم_مع_كريم_فريد" مسابقة تصوير على النت والجوايز كاميرات
Home
Home
خروجات النهاردة
حفلات لايف @ Breezes
أكل
10/20/2017
8:00pm - 12:0am
Ramses Hilton Hotel
برانش مصري @ Lammet Al Khal
أكل
10/20/2017
1:00pm - 5:00pm
InterContinental Citystars Hotel
ليلة عربي @ فندق سوفيتيل الجزيرة
رقص
10/20/2017
10:00pm - 2:00am
Sofitel El Gezirah Hotel
برانش @ ميراج كافيه
أكل
10/20/2017
12:00pm - 3:00pm
JW Marriott Hotel Cairo
وجبة غطار @ Lucca
أكل
10/20/2017
12:30pm - 6:00pm
Royal Maxim Palace Kempinski
BBQ Brunch @ Cairo Marriott
أكل
10/20/2017
1:00pm - 5:00pm
Cairo Marriott Hotel & Omar Khayyam Casino
 ساعة الحظ @ Sherlock Holmes Pub
بارات
10/20/2017
6:00pm - 8:00pm
Ramses Hilton Hotel
غداء عمل @ مطعم مهراجا الهندي
أكل
10/20/2017
12:00pm - 12:0am
Ramses Hilton Hotel
Home
Home