• اكتب معانا
  • ماتنسناش
  • تابعنا
Home

الموضوع اللي جاي

جريدة إسرائيلية تكشف استخدام إسرائيل أطفال اليمن كعينات تجارب لأدوية طبية

الموضوع اللي فات

"فيس بوك" هيعمل أبلكيشن تسمح للمستخدمين التبرع للأماكن المنكوبة

المسيحين في الدراما المصرية كائنات فضائية

والمسيح الحي مابنقولش والمسيح الحي
انا اصلًا تافه، بس مش أوي يعني

أنا كبني آدمة مسيحية مولودة في بيت مسيحي جوه مصر، عيشت حياتي كلها عندي انفصام، بنتكلم في البيت والكنيسة بطريقة، بس احنا على التليفزيون حاجة تانية خالص. تحس كدة إن المسيحين دول كائنات فضائية ماحدش بيتعامل معاهم فلازم نبتكر بقى، ونفضل نتخيل بيتكلموا ازاي وبيقولوا إيه؟

مش المسيحين بس اللي بيعانوا من الموضوع ده في الدراما المصرية، لكن كمان أي "أقلية"، يعني الأجانب لازم يتكلموا لغة عربية غريبة –قال يعني هو ده الإنجليزي-، والإسرائيلين لازم يقولوا شالوم وأي حد أصله مش مصري يقول "خبيبي" .. الـ stereotyping في السينما والمسلسلات المصرية منتشرة جدًا بشكل مبالغ فيه.

  • تعرف منين إني أنا مسيحي؟ 

**"الصليب" دي الطريقة السهلة بقى، أنا مسيحية بقالي 25 سنة أهو، مافتكرش إني لبست صليب غير مرات محدودة، طبعًا مش ده السائد، فيه ناس بتلبس سلاسل صلبان طول الوقت، بس هي الفكرة في المبالغة، يعني ليه الست ماسكة الصليب في إيدها وهي بتتكلم؟ ليه ها؟ بتقول للناس أنا مسيحية أهو خدوا بالكم، شايفين الصليب؟

لو ماخدتش بالك من الصليب بقى، يبقى لازم نخلي المسيحين دول أساميهم باينة وواضحة كده، جرجس مثلًا لو راجل، وإيفون لو ست، مش عارفة اشمعنى اسم إيفون رغم إنه نادر يعني، مالها مريم؟ بسيط أهو وسهل.. اه صحيح المسلمين كمان اسمهم مريم عادي مش هيبان إن دول مسيحين

 مانت لو ماعرفتش من الاسم ولا من الصليب بقى إنهم مسيحين، نجيبلك صور كتير في البيوت، صورة المسيح والعدرا والقديسين.. أيوه فيه مسيحين بيحطوا صور فعلا، بس مش بيقلبوا البيت متحف يعني!

  • بنصلي ازاي؟

الحقيقة مافيش مسيحي بيصلي بيقول "أبانا الذي في السموات" بالشكل اللي بيجي في المسلسلات والأفلام ده، صلاة المسيحين أشبه بالدعاء بنقول فيه يارب عادي يعني، أما "أبانا الذي في السموات" دي كأنها دعاء محفوظ بيتقال على بعضه وهو طويل شوية يعني، مش كل الصلاة كده.

"الرب" مش عارفة مين وهم الناس إننا مابنقولش ربنا أو "الله" زي البني آدمين، كلمة الرب دي ماتقالتش غير في الإنجيل اللي سبحان الله كتب كلماته أصلا مراجعين لغة عربية مسلمينّ يعني الكلمة لغة عربية بس مابنقولهاش في كلامنا العادي.

ومابنقولش "آمين" بتفخيم الألف كده، إلا لو صلاة قبطي في كنيسة أرثوذكسية، لكن بنقول آمين عادي زي ما بتسمعها في المسجد، نفس النطق

  • كلمات غريبة

"سعيدة":  أنا مش عارفة كلمة مساء الخير اختفت فين؟ ده احنا بنقول السلام عليكم أكتر من سعيدة دي، الكلمة دي كانت بتتقال أيام عماد حمدي "سعيدة مبارك" غير كده عمري ما سمعتها

 

بما إننا كائنات فضائية، لازم نقول كلمات كده تحس إنها جاية من سيبستون زي "الأشرار"، إيه أشرار دي؟ ناقص نحاربهم بالمجانيق

وافاجئكم بقى؟ سبحان الله لما حد بيموت بنقول "الله يرحمه" مش "الله يقدس روحه"، يقدسها ازاي يعني؟ هو علشان كان "مقدس" يبقى ربنا هيقدس روحه؟!

  • الحلفان

"والمسيح الحي": الكلمة دي ماحدش بيحلف بيها غير قلة قليلة، تقريبًا هما نفهسم عرفوها من المسلسلات والأفلام، عمومًا يعني المسيحين في أغلب الأوقات مابيحلفوش، بيقولوا "صدقني" أو "بأمانة"، ولما بيحلفوا بيقولوا "والمسيح" أو "والعدرا" وطبعا فيه ناس بتقول "والله"، بس دي مكتسبة من كتر ما بنسمعها، وماحدش خالص بقى بيقول "والصليب" أو "والرب".

  • اختيار العرايس

على الرغم من إن مشهد فيلم مافيا بتاع "بولين" هيفضل أكتر مشهد بيضحكني في أفلام السقا كلها، إلا إن مش عارفة إيه سر اصرار مؤلفين الأفلام إن المسيحين علشان يتجوزوا لازم الكاهن يختارلهم العروسة، يعني من مافيا، للأخت تريز، لفيلم هندي، لازم الكاهن هو اللي يختار العروسة، وبالإجبار كدة بالعافية!

طيب أصدمكم بقى؟

قريب جدا طلع قرار كنسي إن العروسين لازم ياخدوا كورس في الكنيسة قبل الجواز ويروحوا، لأن الناس كانت بتعرف بعض بره الكنيسة -سبحان الله- وتروح هناك علشان تتجوز بس، وماحدش جواها يعرف مين دول أساسًا وبعدين تحصل مشاكل.

أغلب الفيديوهات اللي فوق دي من مسلسل "الأخت تريز" مش لأنه الأوحش ولا حاجة، بس لأنه قايم على أساس قصة واحدة مسيحية وراجع تفاصيله الأنبا إبرام أسقف الفيوم، بس تقريبًا الراجل نفسه اتعود على طريقة الظهور دي فمابقاش يعلق. بس خلينا نعترف إن الكلام ده كله حاصل بسبب إننا كائنات فضائية فعلًا، مابننشرش غسيلنا قدام الناس، ومابنظهرش في الإعلام نتكلم عن اللي بيحصل جوه الكنايس عادي كده غير في الأعياد والمناسبات الرسمية، والكنيسة بتصمم إن كل المسيحين يطلعوا في الدراما ملايكة.

يعني فيلم "بحب السيما" اللي كان واقعي رغم "أفورته" اتهاجم واتبهدل، وأي مسلسل طلع واحد مسيحي متعصب ولا رخم ولا بيسرق ولا بيشتم تقوم الدنيا وماتقعدش، مسيحي يبقى لازم أقول عليه أخويا واحضنه ويبقى حلو كده ومؤدب وجميل، مافيش مسيحين وحشين! لما المؤلفين والمخرجين يتعاملوا مع المسيحين عادي يعني إنهم ناس طبيعية تعيش وتتعايش، وقتها بس هيبقى ظهور المسيحين في الدراما طبيعي ومقبول.

الموضوع اللي جاي

جريدة إسرائيلية تكشف استخدام إسرائيل أطفال اليمن كعينات تجارب لأدوية طبية

الموضوع اللي فات

"فيس بوك" هيعمل أبلكيشن تسمح للمستخدمين التبرع للأماكن المنكوبة
Home
Home
خروجات النهاردة
 ساعة الحظ @ Sherlock Holmes Pub
بارات
10/22/2017
6:00pm - 8:00pm
Ramses Hilton Hotel
غداء عمل @ مطعم مهراجا الهندي
أكل
10/22/2017
12:00pm - 12:0am
Ramses Hilton Hotel
تخت شرقي @ الكبابجي
أكل
10/22/2017
7:30pm - 11:00pm
Sofitel El Gezirah Hotel
برياني @ مهراجا
منوعات
10/22/2017
4:00pm - 7:00pm
Ramses Hilton Hotel
تخت شرقي @ La Palmeraie
أكل
10/22/2017
7:30pm - 11:00pm
Sofitel El Gezirah Hotel
قضي يوم @ سوفيتيل الجزيرة
منوعات
10/22/2017
12:00pm - 12:0am
Sofitel El Gezirah Hotel
Home
Home