• اكتب معانا
  • ماتنسناش
  • تابعنا
Home

الموضوع اللي جاي

ميزانيات المدن الجديدة نزلت و مدينة 6 أكتوبر في المركز الأول

الموضوع اللي فات

"محمد رمضان" متعاقد على 12 عمل فنى هيقدمهم خلال سنتين

حوار مع أحمد مالك قبل ما يطفئوا الشمس

انا ضد فكرة إن شخص ما نجم، يعني إيه نجم أصلًا، أي حد ممكن يبقى نجم، ده حتي كاردشيان بقت نجمة!
بطيخ أكثر من هذا سوف يأتي، بطيخ أكثر من هذا سوف يمر

عيون ماليها الدموع بتلف شوارع القاهرة بالليل، قلب مليان غضب وحزن، بينزل من العربية وعلى وشه تعبير حزين غير متزن، يسند على سور الكوبري، ليه كل ده يحصل؟! وأنا ما طلبتش من الدنيا غير إني أكون مبسوط من غير ما ده يسبب أذى لحد، الدنيا مش عادلة، اه فيا العبر، بس عمري ما كدبت على نفسي ولا على حد، الأفكار بتتصارع في دماغه، يرفع رجل على السور، تلحقها الرجل التانية، يقف للحظات يبص للمياه تحته، تغلبه دموعه اللي ما وقفتش و…

تنتهي الحلقة وتبتدي تعليقات ما بتنتهيش وعياط في أغلب بيوت مصر وهما بيشوفوا آدم بينتحر قدامهم بعد ما حبيبته انتحرت، ما قدرناش نستنى وفضولنا غلبنا نعرف "أحمد مالك" اللي عيط بيوت مصر بعد ما ضحكها، فروحنا ندور عليه في أوضته.

"أحمد مالك" فتحلنا ومعاه قططه (4 قطط) والكلب بتاعه، طبعًا كلنا نفضنا للتصوير ومشهد الانتحار والانترفيو، وقعدنا نلعب معاهم. أوضة "أحمد" جميلة ومش محندقة، بيقولنا إن صحابه بيملوا الأوضة وما بتبقاش زحمة، بس احنا طبعًا بكاميراتنا ومعداتنا زحمناله الدنيا. لو كنت مكانه كنت طردتنا بس على العكس قعدنا نتكلم ونضحك معاه. على يمين الأوضة تليفزيون كبير، كان بيتفرج على فيلم ل"دي نيرو" قبل ما نطب عليه، ومكتب مليان كتب أغلبها عن التمثيل. الحيطه مليانة بوسترات وقصاصات فنية وأسطوانات مزيكا. بطلنا تفتيش في أوضته وقولنا ما بدهاش بقى، نبتدي الانترفيو بتاعنا.

ازاي ابتديت التمثيل؟

- أول مرة أقف قدام الكاميرا كنت في أولى ابتدائي، بالصدفة، بس عمومًا من وأنا صغير وأنا بحب أمثل، لحد ما اكتشفت إن دي الموهبة اللي عندي واللي بتشكل حياتي. مرة سوّحتهم، عملت فيها دكتور لمدة أسبوع، جبت ديتول كتير فشخ، قعدت أحطهم في أزايز، كنت بحاول اخترع حاجة. مره حاولت اخترع لون جديد، وطبعا فشخت الدنيا, في مرة كنت مقتنع إني إمام مسجد، فأنا طول الوقت بحب أمثل.

خالي لاحظ ده وكان عنده واحد صاحبه شغال زمان في casting إعلانات، زيت بقى ومكرونة والحاجات دي، خدني أعمل إعلان مكرونة وأنا في أولى ابتدائي، ودي كانت أول مرة، وبعدين عملت كاستنج كتير، فمن صغري متعود طول الوقت اقف قدام كاميرا، وبعدين الموضوع قعد يتدرج، لحد ما وصلت للنهاردة. 

طب لما كبرت شوية وقررت إنك تبقى ممثل وتحترف مهنة التمثيل، رد فعل أهلك كان قشطة ماشي ولا كان إيه؟

لا في الأول طبعًا كأي عيلة، ابني إيه ويخش في الوسط ده ازاي، بس هم عارفين أصلًا إني من وأنا صغير بمثل، فبالنسبالهم اه سيبوا الولد يتبسط شوية، لحد ما بالصدفة برضة عملت مسلسل "الجماعة" مع المخرج الكبير جدًا "محمد ياسين"، ومن هنا ابتدوا يلاحظوا همَّ وناس كتير إني عندي موهبة، لكن أنا لحد اللحظة دي ماكنتش مقتنع، وبعدين المخرج محمد سامي طلب مني أمثل معاه مسلسل اسمه "مع سبق الإصرار"، جابني في دور واحد ب "stutterer" بالعامي يعني بيتهته، وده غلط، مافيش حاجة اسمه بيتهته، اسمها عنده مشكلة في الإلقاء، حتى وقتها برضه كنت لسه مش مقتنع بإني موهوب.

بعدها بسنة عملت مسلسل تاني مع نفس فريق العمل اسمه "حكاية حياة"، بعديه عملت دوري في فيلم الجزيرة 2، لحظتها حسيت إني محتاج أوقف، محتاج أسأل نفسي أسئلة مهمة، أنا بعمل إيه؟ وإيه هو التمثيل؟ وأنا بمثل ليه؟ ومن هنا ابتدت مسيرة إني عايز اكتشف فن التمثيل بشكله الصادق الحقيقي، مش بشكله التجاري وهالة الشهرة اللي محاوطاه، ماكنتش عايز يبقى الموضوع معتمد على الشكل، لكن يبقى معتمد على الدراسة وابقى فاهم الفن ده كويس، عايز ابقى صادق في اللي بقدمه.

من هنا ابتدت مسيرة إني عايز اكتشف فن التمثيل بشكله الصادق الحقيقي. 

عملت ده ازاي؟ يعني ابتديت تاخد ورش ولا درست ولا إيه؟

ابتديت استنجد بأي ورش موجودة أو متاحة، في مؤسستين في مصر بتعلم أو بتدرس تمثيل، هي المعهد العالي للفنون المسرحية تبع أكاديمية الفنون، ومسرح الجامعة الأمريكية، فأنا ماكنتش اعرف أخش المعهد، وكنت متأخر جدًا على إني ادخل ال AUC، ولأسباب مادية برضه، غالية جدًا طبعًا، فقررت إني أخوض الموضوع بشكل مستقل، ابتديت بقى اتسحل مع الكتب، اشوف الطرق المختلفة والنظريات زي أي حد عايز يتعلم فن التمثيل مش مهنة التمثيل.

ابتديت اشتري الكتب اللي بتتكلم  عن "Method Acting"، هي نظرية أو تكنيك في التمثيل، اللي حطها المخرج "ستانسلافسكى"، ابتدى طلاب من أمريكا يروحوا يتعلموا النظرية دي في روسيا ويرجعوا يطبقوها في أمريكا، من تلاميذهم طلعلنا "الباتشينو" و"دي نيرو".

"Sanford Meisner" عنده جملة مهمة في التمثيل وتقريبًا دي اللي قايم عليها كل حاجة، التمثيل هو "إنك تعيش بشكل صادق تمامًا لكن في ظروف خيالية"، بس بتطبق الظروف عليك وتعيش جواها فيطلع أدائك صادق، ابتديت آخد الموضوع فردي بعدين أخدت كذا workshop مع ناس مختلفة، بعدين كان في مجموعة من الممثلين وأنا فخور بيها، بنحاول نطور من نفسنا بشكل مستقل شوية. 

- أنت قولت في الأول إن أهلك عارضوا الفكرة بتاعة إنك تكون ممثل، إيه اللي حصل خلاهم يغيروا رأيهم؟

- لما حسوا يعني بطعم النجاح فجأة، شافوني نجحت فقالوا خلاص، أوك، ولقوني برضه بدخل فلوس. 

في ممثل شايف إنه مثلك الأعلى أو نفسك تبقى زيه؟

أنا مش شايف نفسي زي أي حد ولا عايز ابقى زي حد، ودي مش نرجسية، أنا بس بحاول أشق طريقي، ومش عارف تحديدًا هيوصلني لفين، بس أنا حابب أمشيه، بس لو بتسألي على مين أكتر حد بحبه، فهم كتير، بس طبعًا الأب الروحي لكل طرق التمثيل الصادقة "دانيال دي لويس"، ده اللي خد التمثيل لحتة تانيه ماحدش سبقه فيه، وإدوارد نورتون طبعا. 

- بالنسبة للمسلسل طبعا كلنا عارفين إن في فيلم اتعمل عن نفس الرواية قبل كده، إيه اللي اختلف ما بين الرواية والفيلم والمسلسل من وجهة نظرك؟

خلينا نتفق إن كل نوع من الفن ليه تفسيراته وتطبيقاته الخاصه بيه، ليه كل الناس اللي بتتفرج على فيلم متاخد عن رواية بتحب الرواية في الأغلب أكتر من الفيلم؟ علشان الرواية مخك بيفسرها بطريقته وبالصور اللي في خياله، فمخك هو اللي بيخلق الصور دي، وبالتالي بيشوفها بطريقته، لو المخرج قدر يوريك الحاجة اللي في دماغك في الفيلم، ده بيبقى معناه إن الرؤية اللي في مخيلة المخرج شبه الرؤية اللي في مخيلتك، بس دايمًا أي رواية هتيجي تقارنها بالتفسير اللي خلقه أي فيلم أو مسلسل متاخد عنها، هيبقى مختلف، فهو اللي حصل إن أستاذ تامر حبيب شايف الرواية بعينيه كفنان، وعرض التفسير بتاعها بالشكل اللي هو شايفه، طبعًا بعد الحقوق المادية والأدبية لكاتب كبير زي أستاذ إحسان عبد القدوس.

عموما المسرح ملك الممثل، والتليفزيون ملك الكاتب، والسينما ملك المخرج

الفيلم كان من بطولة أحمد رمزي، ماخفتش الناس تقارنك بيه؟

أكيد طبعًا كنت خايف علشان ده أحمد رمزي، مين أنا اصلًا؟! ده أحمد رمزي يعني. قررت إني مش هتفرج على الفيلم علشان ما اتأثرش بيه وأشوف أنا الموضوع جوايا عامل ازاي وهقدر أخرجه في النهاية بشكل عامل إيه.

كنت قولت إنك بتدور على الشخصية جواك علشان تقدر تطلعها، إيه اللي في شخصية آدم شبهك؟

هو شبه مرحلة معينة في حياتي، كنت مقرر إني هنطلق أكتر، وهلغي أي حدود في حياتي، وحاولت يبقي آدم شبيه ليا وطريقة الكلام بتاعته شبه طريقتي. 

أنت قولت في المسلسل كلمتين "كلوت" و "فشخ" والناس علقت على الكلمتين دول 

الواقع لازم يكون مرتبط بالفن، طبعًا احنا مش هنقدر كل حاجة في الواقع نحطها في الفن، وفي ناس بتضايق من ده، بس لو اللفظ بيتداول في الشارع كتير ومش هيجرح حد ولا حاجة، يبقى إيه المشكلة؟ احنا بنقول اللي موجود وفي نفس الوقت مازودنهاش، يعني ماقولناش كل الحاجات اللي فعًلا بتتقال في الشارع، وأعتقد كلمة "فشخ" المفروض نتخطاها، مع الوقت كل حاجة بتتغير، من 40 أو 50 سنة بس الست ما كانتش تقدر تصوت في الانتخابات في سويسرا، بس العالم بيتغير والكلمة اللي كانت تقيلة زمان بتتقال دلوقتي عادي وهكذا.

بس أنت شخصيًا شايف إن المسلسل لازم يبقى زي الواقع؟

اه طبعًا لكن يبقى بشكل متوازن، نبقى واقفين على السلم، وما نجرحش حد، وفي نفس الوقت ما نضحكش على نفسنا، بعدين احنا بنشوف أخبار كل يوم والناس بتتقتل، اللي هيضايقكم "كلوت" و"فشخ"؟ وعمومًا المسرح ملك الممثل، والتليفزيون ملك الكاتب، والسينما ملك المخرج، ده اللي احنا بنقوله في حياتنا العادية والمؤلف نقله للمسلسل لإننا ماينفعش نتجاهله.

أنت وقفت قدام مي الغيطي من 4 سنين في فيلم الجزيرة، ورجعت وقفت تاني قدامها النهاردة في "لا تطفئ الشمس" حاسس أنتوا الاتنين اتغيرتوا ونضجتوا قد إيه؟

حصل نضج كبير جدًا طبعًا، ومي شاطرة وبتعرف ازاي فجأة تلقط الموضوع، غير إن عندها "emotional range" عالي قوي، وبتعرف ازاي تتحكم فيه. أنا مش عارف هي من جوّه عاملة ازاي، لكن أنا من جوّه فرق السما من الأرض ما بين "الجزيرة 2" وبين "لا تطفئ الشمس"، مش بس إني نضجت كفكر لإن ده طبيعي يحصل، الوقت لما بيعدي على الإنسان بيخليه يكبر، بس بالنسبالي نظرتي نفسها للتمثيل وللفن اتطورت واتغيرت ونضجت.

المسلسل جاب صراعات بين طبقات اجتماعية مختلفة، رأيك إن ده بيحصل فعلًا؟

أنا حاسس أصلًا إن اللي في الحقيقة أكتر من اللي احنا جبناه، لإننا عندنا مشكلة كبيرة في المجتمع، مش المجتمع بس، العالم ككل، النظرة الطبقية اللي موجودة في العالم كله.  

 

 قولت إن الناس حبت شخصية آدم والفضل كله يرجع للمخرج محمد خضير، قد إيه من الشخصية نقدر نقول إنه أنت وكام في المية نقدر نقول إنه المخرج؟

أنا مش متعود أقول بقى بعد نهاية العمل إن كل Cast كانوا إيد واحدة وبيحب بعض والكلام ده، بس فعلًا محمد خضير عارف بالظبط الممثل محتاج إيه وبيدهوله، بيقدر يعرف نقطك كويس ويدوس عليها، ويقدر فعلا يطلع منك اللي هو عايزه بالظبط في الوقت المناسب، ويعرف ازاي بالظبط يهديني، ببقى رايحله وأنا متوتر جدًا وبسأله ها حلو؟ كان حلو؟ عجبك؟ بيقدر يساعدني اتطور، هو المتحكم الكامل في اللوكيشن، يقدر يخلينا كلنا في السما أو يخسف بينا الأرض، أنا كنت محظوظ إني اشتغلت معاه السنة دي.

الشخصية بقى بالنسبالي كآدم، أكتر حاجة خلته محبوب هو إنه أصدق حد فيهم، والناس عمومًا بتحب الصادق حتى لو شخص سيئ زي دونالد ترامب مثلا، الناس بتحبه علشان هو صادق، هو ابن و... وعارف ابن و... وبيقول إنه ابن و... ومعترف بده. 

أي حد ممكن يبقى نجم، ده حتي كاردشيان بقت نجمة! إيه اللي هي عملته في حياتها غير إنها اتصورت في فيلم سكس والناس شافته؟

أنت في سمعة عليك إنك خاربها حفلات وبيطلعوك منها بالعافية، قد إيه الصورة العامة للممثل قدام الناس مهمة؟

طبعًا عندي مشكلة كبيرة في إني أحافظ على صورتي العامة بكل جوانبها، زي الجانب السياسي، وجانب ال night life، مش عايز يبقى بيتحكم فيا نفس اللي بيتحكم في المشاهير من إني لازم ابقى نجم واتصرف كنجم طول الوقت وأحافظ على صورتي وأخاف عليها، أنا ضد فكرة إن شخص ما نجم، يعني إيه نجم أصلًا، أي حد ممكن يبقى نجم، ده حتي كاردشيان بقت نجمة! إيه اللي هي عملته في حياتها غير إنها اتصورت في فيلم سكس والناس شافته؟ ده كل اللي هي انجزته في حياتها!

دي تفسيرات غلط المجتمع بيفرضها عليك، بالنسبالي أنا عايز أكون فنان حقيقي، اه أخلاقياتي وسلوكياتي عندي مشاكل فيها زي أي حد عنده مشكلة في أخلاقياته وسلوكه، بس ده ما يخليش أي حد ليه الحق يحكم عليا أو على تصرفاتي، بعدين تصرفاتنا وقناعتنا دايمًا بتتغير مع الوقت، ممكن النهاردة أبقى شخص وبكرة  شخص تاني خالص.

نقط ضعفك في اللوكيشن؟

أنا متردد جدًا، بتأثر بسهولة باللي حواليا، بهيبر، علشان كدة بحتاج دايمًا حد يهديني ويرسيني كدة، ببقى حساس في اللوكيشن، أي حاجة ممكن تأثر عليا.  

أنت شايف الممثل ممكن يعبر عن رأيه السياسي؟

أنا شايف إن من حق أي إنسان إنه يعبر عن رأيه السياسي عامة، سيبك من فكرة الممثل دي، علشان دي خناقتي هو الممثل إيه يعني؟! الممثل فنان، والفنان مواطن، والمواطن هو بنى آدم على ضهر الأرض دي، بس بقى الفكرة إن وضعك لما يبقى حساس شوية، هيبقى عليك تأثير سلبي أو إيجابي، فأنا قررت إني أركز في الفن اللي بقدمه وابعد عني أي حاجة هيبقالها تأثير سلبي عليا، بالتالي مش حابب أقول رأيي السياسي.

فأنا قررت إني أركز في الفن اللي بقدمه وابعد عني أي حاجة هيبقالها تأثير سلبي عليا

Shoot by @MO4Network's #MO4Productions.
Photography by Mohamed Mortada.

الموضوع اللي جاي

ميزانيات المدن الجديدة نزلت و مدينة 6 أكتوبر في المركز الأول

الموضوع اللي فات

"محمد رمضان" متعاقد على 12 عمل فنى هيقدمهم خلال سنتين
Home
Home
خروجات النهاردة
حفلات لايف @ Breezes
أكل
10/20/2017
8:00pm - 12:0am
Ramses Hilton Hotel
برانش مصري @ Lammet Al Khal
أكل
10/20/2017
1:00pm - 5:00pm
InterContinental Citystars Hotel
ليلة عربي @ فندق سوفيتيل الجزيرة
رقص
10/20/2017
10:00pm - 2:00am
Sofitel El Gezirah Hotel
برانش @ ميراج كافيه
أكل
10/20/2017
12:00pm - 3:00pm
JW Marriott Hotel Cairo
وجبة غطار @ Lucca
أكل
10/20/2017
12:30pm - 6:00pm
Royal Maxim Palace Kempinski
BBQ Brunch @ Cairo Marriott
أكل
10/20/2017
1:00pm - 5:00pm
Cairo Marriott Hotel & Omar Khayyam Casino
 ساعة الحظ @ Sherlock Holmes Pub
بارات
10/20/2017
6:00pm - 8:00pm
Ramses Hilton Hotel
غداء عمل @ مطعم مهراجا الهندي
أكل
10/20/2017
12:00pm - 12:0am
Ramses Hilton Hotel
Home
Home