• اكتب معانا
  • ماتنسناش
  • تابعنا
Home

الموضوع اللي جاي

"جويل" في مصر

الموضوع اللي فات

#شكرا_جوزيه.. جماهير الأهلي بتكرم الساحر

الرقص على الأحزان .. مدرسة حزلقوم الموسيقية

أغاني حزينة مفعمة ببهجة غير متوقعة ..
بطيخ أكثر من هذا سوف يأتي، بطيخ أكثر من هذا سوف يمر

لما محمد منير خرج علينا سنة 1992 بأغنية “أحزن أغني أفرح أغني” كان بيوصف فعلا الناس العادية اللي طول الوقت بيغنوا لأفراحهم ولأحزانهم على حد سواء. لسنين طويلة عبّر اللحن المصاحب للأغنية عن الكلمات، يعني الأغنية الحزينة اللي بتتكلم عن الفراق والحيرة والخصام  كانت كلها بتتقدم  بلحن حزين، وحتى الآلات الموسيقية الأساسية فيها كانت بتبقى آلات حزينة، زي الكمان والناي، يحسسوك إنك هتقوم تقطع شرايينك، أما الأغاني  اللي كلماتها عن الحب واللقا والأمل، تلاقي معاها لحن راقص مبهج، يخليك عايز تقوم تمسك إيدين حبيبتك وترقصوا سوا لآخر الليل، وده الطبيعي و المنطقي و البديهي كمان، لكن حصلت طفرات على ايد سيد درويش والرحبانية غيرت شكل المزيكا العربيه للأبد.

فيروز والرحبانية

اعتمد الرحبانية فلسفة جديدة  في المزيكا، قرروا يدوا الكلمات الحزينة ألحان مبهجة ترَّقص، لإننا بنعيش مرة  واحدة، ولإن العمر أقصر من إننا نقضيه في حزن معتم، فتعالوا نرقص على أحزاننا..

أغاني كتير اتقدمت بنفس الفلسفة، زي أغنية "سهر الليالي" اللي اختار أغلب المصريين الرقص عليها في ختام أحد أهم لحظات السعادة في حياتهم، واللي كلماتها حزينة جدا، "سهر الليالي" بتحكي حدوتة تغير الأحوال عبر الزمن، حاول كده تقراها من غير مزيكا.

وراحت الأيام وشوي شوي
سكت الطاحون عَكت ف المي
وجدّي صار طاحون ذكريات
يطحن شمس وفيّ
آه يا سهر الليالي
آه يا حلو على بالي
غني ...غني على الطرقات

 الرحباينة و فيروز قرروا يحكوا الحكاية بمزيكا مبهجة ويرقصوا ويخلوا الناس ترقص عليها لحد النهاردة، نفس الشيء بيتكرر في أغنية "حنا السكران" وأغنية "يا أنا يا أنا" و "آخر أيام الصيفية" - "علموني" - "نسم علينا الهوى" - "رجعت الشتوية" وغيرهم كتير. 

سيد درويش

يمكن الوحيد اللي سبق الرحبانية في الفلسفة دي كان الشيخ سيد درويش، لما غنى "محسوبكوا انداس" بلكنة يوناني تضحك

مخسوبكو انداس ..  صبح محتاس  .. مسختوا بابوتسي ياناس
مفيس فلوس .. بقيتو منخوس .. فلستو خلاص
نستغلوا فى ايه .. ياافندي يابيه .. مادام البخت موريه

عدوية

الموضوع اتطور بعد كدة،  وآمن بالفلسفة دي ناس كتير، من أبرزهم أحمد عدوية، وفنانين الأغاني الشعبية عموما. سنة 1969 بعد النكسة بسنتين، حسن أبو عتمان الشاعر كتب أغنية "سلامتها أم حسن" وكانت لمصر بالمناسبة، لحنها الملحن فاروق سلامة، وغناها أحمد عدوية.

سلامتها أم حسن .. من العين و من الحسد
وسلامتك يا حسن من الرمش اللي حسد
سلامتها . . سلامتها .. سلامتها أم حسن

وأغنية "زحمة"، عبقرية اللحن اللي تخليك ترقص على كلمات زي

زحمه يا دنيا زحمة
زحمة و راحو الحبايب
زحمه ولاعادش رحمة .. مولد وصحبه غايب

حتى الأندرجراوند، أغنية "انساب وليه تنربط " جرّب مرة تسمعها من مريم صالح ومرة تسمعها من بلاك تيما، هي هياها نفس الكلمات ما تغيرتش في الحالتين

انساب وليه تنربط
ياللي في ضهرك جناح
احزن عشان تنبسط
وموت عشان ترتاح
دا الموت يعيدك لأصلك
بس أنت موتك معصلج
ياللي أنت وشك غريب
ياللى أنت قلبك محاصرك

لو سمعتها من مريم صالح هتلاقي الكلمة اللي معلقة معاك هي "وموت عشان ترتاح”، في حين إنك لو سمعتها من بلاك تيما، هتلاقي الكلمة اللي معلقة معاك هي "انساب وليه تنربط "، الكلمات واحدة والحكاية واحدة، لكن بس طريقة الحكي هي اللي اختلفت، واتغير معاها كل حاجة، اللحن بس اللي بيرقّص قدر يخلي الكلمات كلها ترقّص.



مطربين الشعبي

من أجمل اللي قدروا يرقصوا على حزنهم ويرقّصوا مصر كلها معاهم، مطربين الأغاني الشعبية، لو بتسمع أغاني شعبي، أو عارفها ع الأقل، أو لو حضرت أي فرح قريب، هتلاقي الفرح كله بيرقص ويغني ويتنطط على أغاني كلماتها زي

أنا اللي كان شاغلني واللي كان قاتلني
اديتهم كل حاجه وهما استغنوا عني
وهما استغنوا عني وهما استغنوا عني

أو أغنية تانية كلماتها

أنا بتقطع من جوايا ونسيت طعم الفرح
وأنتي يا دنيا مش فاكراني غير بالنار والجرح


المزيكا هي الحاجة الوحيدة اللي بتتكلم كل اللغات، تقدر تطبطب عليك، تشاركك حزنك، ترقّصك، تخليك في لحظة على عرش العالم واللحظة التانية سهران على بساط الأرض بتناجي النجوم. لو عاوز أغاني تانية ترقصك على الأحزان ادخل هنا

الموضوع اللي جاي

"جويل" في مصر

الموضوع اللي فات

#شكرا_جوزيه.. جماهير الأهلي بتكرم الساحر
Home
Home
خروجات النهاردة
 ساعة الحظ @ Sherlock Holmes Pub
بارات
12/11/2017
6:00pm - 8:00pm
Ramses Hilton Hotel
غداء عمل @ مطعم مهراجا الهندي
أكل
12/11/2017
12:00pm - 12:0am
Ramses Hilton Hotel
تخت شرقي @ الكبابجي
أكل
12/11/2017
7:30pm - 11:00pm
Sofitel El Gezirah Hotel
برياني @ مهراجا
منوعات
12/11/2017
4:00pm - 7:00pm
Ramses Hilton Hotel
تخت شرقي @ La Palmeraie
أكل
12/11/2017
7:30pm - 11:00pm
Sofitel El Gezirah Hotel
قضي يوم @ سوفيتيل الجزيرة
منوعات
12/11/2017
12:00pm - 12:0am
Sofitel El Gezirah Hotel
Home
Home