• اكتب معانا
  • ماتنسناش
  • تابعنا
Home

الموضوع اللي جاي

فيديو بيورينا مصر الحلوة

الموضوع اللي فات

"توماس كووك" لغت كل رحلاتها لشرم الشيخ

7 مطربين دخلوا السينما "أكل عيش"

الكار ده مش كارك
صحفي مصري. مُدمن كورة، بحب الثورة وليفربول، وبكره مانشيستر يونايتد

دلوقتي أي مغني ولا أي حد بيعمل أغنية بتنجح، بيكون أول سؤال بيتسأله: بتفكر في السينما؟ هي السينما دي مالهاش أهل يسألوا عليها؟ لو هتدخل مجال السينما فهتحتاج حاجات بسيطة جدًا، زي إنك تكون بتعرف تمثل! ومن بداية الألفية هنلاقي مجموعة من المطربين اللي استغلوا نجاحهم في الغنا وبقوا بيعملوا أفلام، وسبحان الله كل تجاربهم السينمائية تقرف! بنتمنى إن كل التجارب اللي هنكتبلك عنها دي تروح في طي النسيان أو على الأقل ماحدش يفتكرها بالخير. بننصحك تسمع مزيكا وحشة وأنت بتقرا علشان تفضل في المود

1- تامر حسني

أشهر نجوم جيله وأكثرهم نجاحًا. من يوم ما ضربت معاه في الأغاني بقى بيعمل سينما، وله لغاية دلوقتي حوالي 8 أفلام بتمنى كل يوم إني أكون ماشفتهمش بس للأسف الموضوع محتاج أكبر من أماني. جماهيريًا أفلام تامر ناجحة جدًا وماحدش ينفع ينكر ده، الأرقام هي اللي بتتكلم، بس والله ما بتعرف تمثل يا أستاذ تامر، مابتعرفش والله، حد يقوله يا جماعة. نفسي بتموع وأنا بتفرج عليك والله.

 الأغنية في أفلام تامر حسني ما تفرقش عن أفلام تامر حسني، مافيش لا مزيكا حلوة ولا استعراض ولا داعي من الأغنية أصلًا بس بطل الفيلم بيغني فلازم نخليه يغني، أذكر في فيلم تامر وسلمى الجزء الأول، غنى 45 أغنية باين، وده من الأفلام اللي تتفرج عليه أونلاين علشان تعرف تجري معظمها.

تقييم: وسام  نادية الجندي للفنان عن مجمل أعماله

2- محمد فؤاد

فؤاد أقدم من الباقيين وكان له تجارب سينمائية من التسعينات، وفيلم زي إسماعيلية رايح جاي ده غير خريطة السينما كلها، يبقى بعد إسماعيلية رايح جاي تعمل إيه؟ طبعًا، تعمل فيلم عن رحلة مطرب فقير بيتغني وبيتشهر وبيتجوز حبيبته اللي أبوها رافض علشان هو فقير. قصة عملها عبد الحليم حافظ من 97 سنة وسبق أنت وعملت أختها تقريبًا في إسماعيلية رايح جاي، كفاية يا كابتن.

فؤاد له تيمة معينة في كل أعماله الفنية في الفترة دي ولغاية دلوقتي: جدع، ابن بلد، صاحب صاحبه، حنين، مكرم، مفرم، مقبل مدبر وطبعًا مابيعرفش يمثل. محبي محمد فؤاد بنصحهم يشوفوله فيلم وحيد "هو في إيه" إنتاج سنة 2002، وده مش علشان هو حلو بس هو أحسن الوحشيين، والأحسن ماتتفرجوش على فؤاد بيمثل خالص خصوصًا وهو بيعمل مشاهد رومانسية مع المأسوف على شبابها الفنانة حلا شيحا في "غاوي حب".

تقييم: فؤش

3- خالد سليم

في "سنة أولى نصب" كان شعره خواتم، بعد كده كان مسشوره. ده كل اللي ممكن يتقال عن مساهمات خالد سليم السينمائية. ويكيبديا كمان بتقول إنه عمل فيلم اسمه "كارت ميموري"، مين زكي جمعة ده؟! خالد سليم صوته حلو باي ذا واي، مش بيعمل مزيكا حلوة بس صوته حلو، لكن مانصحش تشوف أي فيلم ليه. ممكن تتفرج على عمليات خاصة كنموذج لفيلم أجنبي معموله نسخة مصرية وحشة فشخ. هو بيعمل مسلسلات كمان لكن ده حديث آخر هنتناوله  في حينه إن شاء الله.

تقييم: ....

4- مصطفى قمر

"عصابة الدكتور عمر" و "حريم كريم" ده اللي ممكن تشوفه لمصطفى قمر, وهي أفلام مش حلو بالمناسبة علشان مترفعش سقف التوقعات وترجع تتكدر، هي بس أفلام مش بالسوء الكافي. مصطفى قمر كان له إسهام مهم جدًا في السينما وللأسف منسي، الراجل عمل راوية روميو وجولييت في فيلم كوميدي اسمه "حبك نار". ركز فيه وهتضحك والله

الأغاني في أفلام مصطفى قمر مش محتاجة كلام؛ الفيلم نفسه عبارة عن فيديو كليب طويل. في فيلم فيه أغاني كتير كدة، اللي قدم فيه سمية الخشاب كمطربة، بحب منه بس اللقطة اللي كان فتحي عبد الوهاب هيدبحهم فيها وبتمنى لو الموضوع كمل ودبحهم، وطبعًا لقطة موت الفنان عمرو مصطفى في أول الفيلم لما كان طالع في دور كومبارس.

تقييم: 3 من 10

5- مصطفى كامل

أنا مش زعلان منه، أنا زعلان م الدنيا

تقييم: الله يخربيتنا احنا يا شيخ

6- حمادة هلال

كمية الكوميكس اللي خرجت من أسطورته الخالدة "حلم العمر" تخلينا نغفرله أي حاجة. أفلامه مش بتسقط بالمناسبة، أو الأدق نقول مش بتخسر، وفي أفلام كانت بطولة جماعية زي "العيال هربت" و "عيال حبيبة" عملت إيرادات مش بطالة. وغنى فيها شوية أغاني وعمله كام ألبوم، والمخرج اتراضى والمنتج اتراضى وخلاص.

تقييم: 2.5 من 10

7- حكيم

قدم تجربة وحيدة والحمدلله ماعملهاش تاني، أنا حطيت اسمه بس علشان أقول إني مش مسامح الكاتب والسيناريست بلال فضل.

في تجارب تانية لمطربين كتير في السينما، أغلبها مايستحقش الذكر، حميد الشاعري مثلا عمله فيلمين، بس ده حميد الشاعري، يعمل اللي هو عاوزه أساسًا. كل المكتوبين فوق دول ماقدموش حاجة حد يفتكرهم بيها بعدين، وجماهيريا وعلى مستوى الإيرادات بعضهم نجح وبعضهم فستك. ماحدش فيهم لفت نظري ليه كممثل بعيدًا عن كونه مطرب له جمهور فالمنتج ضامن فلوسه. مافيش فيهم روبي مثلا أو سيمون أو أنوشكا اللي ظهورا كممثليين وعملوا أدوار تقيلة في السينما والتلفزيون. اشتغلوا على نفسكم شوية يا جماعة معلش.

الموضوع اللي جاي

فيديو بيورينا مصر الحلوة

الموضوع اللي فات

"توماس كووك" لغت كل رحلاتها لشرم الشيخ
Home
Home
خروجات النهاردة
بوفيه هندي @ ميراج كافيه
أكل
12/16/2017
12:00pm - 12:0am
JW Marriott Hotel Cairo
 ساعة الحظ @ Sherlock Holmes Pub
بارات
12/16/2017
6:00pm - 8:00pm
Ramses Hilton Hotel
غداء عمل @ مطعم مهراجا الهندي
أكل
12/16/2017
12:00pm - 12:0am
Ramses Hilton Hotel
تخت شرقي @ الكبابجي
أكل
12/16/2017
7:30pm - 11:00pm
Sofitel El Gezirah Hotel
برياني @ مهراجا
منوعات
12/16/2017
4:00pm - 7:00pm
Ramses Hilton Hotel
تخت شرقي @ La Palmeraie
أكل
12/16/2017
7:30pm - 11:00pm
Sofitel El Gezirah Hotel
قضي يوم @ سوفيتيل الجزيرة
منوعات
12/16/2017
12:00pm - 12:0am
Sofitel El Gezirah Hotel
Home
Home