• اكتب معانا
  • ماتنسناش
  • تابعنا
Home

الموضوع اللي جاي

فيديو خناقة وضرب بين ستات منتقبات وعمال مطعم "أم حسن"

الموضوع اللي فات

مخرج "غرابيب سود" بينفي تدخل "قطر" في إيقاف المسلسل

حوار مع خبيرة العلاقات "المنتقبة" سارة سليمان

«حتة القماش شبر في شبر اللي أنا لابساها دي ماغيرتش حاجة في مين أنا»
انا اصلًا تافه، بس مش أوي يعني

"خيمة سودا" دي أول فكرة بتيجي في دماغ ناس كتير لما يشوفوا واحدة منقبة في الشارع، لما يلاقوا لبسها ملون تختلف فكرتهم شوية، بس يقولوا يبقى أكيد "معقدة ورجعية"، لو اتكلموا معاها ولقوها بتقول كلام إنجليزي و"كول" مابيبقوش فاهمين هي ازاي كده؟ دي ماكانتش فكرتنا عن المنتقبات، لكن مايمنعش إننا اتفاجئنا بوجود "خبيرة علاقات" أو "Relationship coach " في مصر منتقبة، وبتتكلم في العلاقات الجنسية وبتقابل “couples” ويتناقشوا في علاقاتهم وتنصحهم، ومن هنا كان حوارنا مع سارة سليمان.

سارة بتعرف نفسها إنها "relationship meta coach" بتدرب المتجوزين عن طريق الكورسات والمحاضرات، وبتعرف المقبلين على الجواز أكتر عنه. 

بدأت حكاية "سارة" مع الموضوع بإنها درست علم اجتماع في الجامعة لكن ماشتغلتش بيه خالص، واندمجت في جوازها والأطفال وتربيتهم، لحد من 5 سنين، "حد في عيلتي شاب متجوز طلق وكان معاه بيبي صغير، ده صدمني وحسسني إن فيه حاجة غلط في منظومة الجواز، وكنت بحاول أساعد بس من غير أي دراسة، بعدين درست أونلاين" بتحكي "سارة" اللي ماكتفتش بالدراسة من الإنترنت وسافرت أمريكا في 2013 تاخد كورس متخصص في الجواز علشان تشتغل بيه.

النقاب اللي كان من 11 سنة مامنعش "سارة" من إنها تتعلم في أمريكا وتكون أول واحدة من مصر تاخد الكورس ده، "من لحظة نزولي المطار كنت خايفة لكن ماكنش فيه أي مشاكل خالص، ماكنتش بشيله غير للدواعي الأمنية" بتقول سارة اللي اتفاجئت بمدى احترام الناس في الكورس، "ماحدش قالي أشيله أو ازاي الناس مش شايفاكي، لما كنت بسأل سؤال كان بيتقالي I will do anything for Arab woman، لأنهم كانوا محترمين أوي إني مسافرة كل المسافة دي علشان اتعلم وأفيد غيري".

"مايكل هولد" هو المدرب الأمريكي اللي علّم "سارة" عن تدريب العلاقات، لما جه مصر في تدريبه السنوي طلبت "سارة" منه إنها تكون مساعدته، في البداية رفض وقالها "أنا مش شايف وشك ولا تعبيراتك هتعامل معاكي ازاي؟"، تفهمت "سارة" ده وقالتلنا، "هو عمره ما اتعرض لمعاملة مع منتقبة غيري، لكن لما جربني وعرف شغلي، طلب مني لسنتين ورا بعض أكون مساعدته، وكل مرة بيطلب مني آجي تاني".

أنا هروح لواحدة ست تعلمني اتجوز ازاي ومنقبة أكيد بقى رجعية ومتخلفة

بعد رجوعها من أمريكا، قررت "سارة" تحترف المجال وتعلن عن كورساتها وعن مكان مكتبها، وبدأت ردود الأفعال اللي كان أولها من راجل، "أول حاجة سمعتها كانت: هو أنا هروح لواحدة ست تعلمني اتجوز ازاي؟ عوضًا بقى عن إنها منقبة وأكيد بقى رجعية ومتخلفة والكلام ده كله" بتقولنا "سارة" وبتكمل: "الغريب إن أحيانًا راجل يجي وعايز مراته تيجي فمراته ترفض لأني منقبة، هي يمكن فاهمة إني هقولها لازم تعمل ودي طبعًا مش طريقتي خالص"، لكن مش دي كل ردود الأفعال، فيه ناس تانية بتروحلها علشان شغلها من غير ما يركزوا في الشكل.

في البداية الناس ماكانتش فاهمة هما بيروحوا يعملوا إيه، وبيسألوا "سارة" المفروض نقول إيه؟ وهي كانت بتفهمهم إن الـ coaching أصلًا إنها تسألهم وهما يجاوبوا، ويفهموا المشكلة فين، "الناس بتبقى جاية عايزة حل، لكن أنا ماعنديش الحل، أنا دوري أفهمهم المشكلة فين ويتدربوا سوا" بتقول "سارة" اللى في البداية كان بيجيلها ناس معينة من خلفيات فكرية معينة، لأنهم كانوا خايفين مش عارفين هي مين وبتعمل إيه، بس لما الكلام بدأ ينتشر إنها شاطرة في شغلها، بدأت تتعامل مع كل أطياف المجتمع، المنتقبات والمحجبات وغير المحجبات والرجالة من مختلف الثقافات والمعتقدات.

سارة بتدي كورس جواز بقالها 5 سنين بتدرسه لمتجوزين كتير. من بداية الكورس الستات بيبقوا عارفين إن آخر جزء فيه بيتكلم عن العلاقة الجنسية، وبحسب كلام سارة بيبقوا مهتمين جدًا ومستنيين يسمعوا حاجة جديدة لأول مرة في الموضوع ده، لكن بحسب كلامها برضه مابيبقوش عارفين يتعاملوا مع ده ازاي، بتقول "سارة": "مرة اتقالي هو أنا هقول لجوزي إيه؟ أنا كنت فين؟ وعرفت الكلام ده ازاي؟ فحتى بعد ما الستات عرفت، بقى عندها مشكلة إن جوزي هيقول عليا مش كويسة". لكن خبيرة العلاقات بتشجعهم يتكلموا مع أزواجهم، "في بداية الكورس بيكون فيه سيشن عن التواصل، فهما بيبقوا مدركين إن نص المشاكل بسبب عدم الكلام، أنا بقولهم أهو فيه حاجة بينكم مشتركة وهي علاقتكم، اتكلموا فيها".

الكلام عن العلاقات الجنسية شائك، فيه ناس بتتكلم بشكل يصنف إنه "ديني" وناس بتتكلم بشكل "منفتح"، لكن سارة كانت بتجمع بين كل طرق الكلام. اتفاجئنا لما لاقيناها في فيديو ليها بتتكلم عن الألعاب الجنسية، ولما سألنها عن ده قالتلنا: "الناس مش بتبقى عارفة إننا ممكن ندي العلاقة شكل جديد مش نمطي، أنا قلتلهم إن فيه ألعاب وكتب وروايات وحاجات كتير مختلفة، إذا كان الغرب تفننوا في المجال ده وهما علاقاتهم بره الجواز، أولى إننا نستفيد بحاجة زي دي جوه الجواز".

شبر في شبر حتة القماش اللي أنا لابساها دي ماغيرتش أنا مين

ست تتكلم في العلاقات الجنسية في مجتمعنا "عيب"، لكن ست منتقبة كمان، دي مشكلة تانية خالص، "سارة" قالتلنا: "مين قال إن فيه إطار للنقاب علشان كلامي في العلاقات يبقى بيتناقض معاه؟ النقاب مش معناه نمطية أو رجعية ولا رهبنة، الناس اللي اديت النقاب معنى غلط، شبر في شبر حتة القماش اللى أنا لابساها دي ماغيرتش أنا مين".

سارة متزوجة وأم  لطفلين، حسب كلامها إن جوزها هو السبب في نجاحها وهو اللي عرفها عن تدريب العلاقات، "ماكنتش هوصل لكل ده إلا لما هو كان يدعمني، ويشيل معايا كتير".

أكتر المشاكل الموجودة بين المتجوزين هي الخيانات

سألنا "سارة" عن أكتر المشاكل الموجودة بين المتجوزين، فقالتلنا إنها الخيانات وتعدد العلاقات بره الجواز، اللي بيندرج تحتها كمان إدمان الإباحيات، "بقى فيه سهولة في الحصول على أي فيديو من الانترنت، وفيه ناس عارفة إنه غلط بس مدمنة ومش عارفة تبطله وده ليه علاج ومتخصصين، لكن أنا بوضح للزوجين خطوات معالجة ده" بتقول "سارة" اللى بتكمل: "الست بتعتبر ده خيانة وإنك بتبص لحد غيري وبيبقى عندها مشكلة ثقة وعدم إحساس بالأمان، وده اللي لازم الراجل يفهمه".

كل يوم بتقابل سارة متجوزين كتير ومقبلين على الجواز، لكن أكتر حاجة بتفضل فخورة بيها، "إن يبقى داخل عليكي 2 مكشرين واخدين قرار الطلاق، بيخرجوا من هنا بيفكروا ويراجعوا قرارهم بعد ما عرفوا سبب المشكلة الحقيقي وبيتغيروا مع الوقت" بتقول "سارة".

"فجأة كده 2 حبوا بعض قرروا إننا حلوين يلا نتجوز، من غير أي تدريبات أو معرفة، وأنا بقولهم إن الحب لوحده مش كفاية" بتقول "سارة" اللي بتنصح أي 2 رايحين يتجوزوا يروحوا لحد خبرة يفهموا ويتعلموا ويعرفوا المشاكل والواجبات والحقوق.

Shoot by MO4 Network

photography by Ahmed Zaher

Videography by Mark Hanna

الموضوع اللي جاي

فيديو خناقة وضرب بين ستات منتقبات وعمال مطعم "أم حسن"

الموضوع اللي فات

مخرج "غرابيب سود" بينفي تدخل "قطر" في إيقاف المسلسل
Home
Home
خروجات النهاردة
 ساعة الحظ @ Sherlock Holmes Pub
بارات
10/22/2017
6:00pm - 8:00pm
Ramses Hilton Hotel
غداء عمل @ مطعم مهراجا الهندي
أكل
10/22/2017
12:00pm - 12:0am
Ramses Hilton Hotel
تخت شرقي @ الكبابجي
أكل
10/22/2017
7:30pm - 11:00pm
Sofitel El Gezirah Hotel
برياني @ مهراجا
منوعات
10/22/2017
4:00pm - 7:00pm
Ramses Hilton Hotel
تخت شرقي @ La Palmeraie
أكل
10/22/2017
7:30pm - 11:00pm
Sofitel El Gezirah Hotel
قضي يوم @ سوفيتيل الجزيرة
منوعات
10/22/2017
12:00pm - 12:0am
Sofitel El Gezirah Hotel
Home
Home