• اكتب معانا
  • ماتنسناش
  • تابعنا
Home

الموضوع اللي جاي

محمد رمضان: فنان حقيقى و لا أسطورة شعبية هتروح لحالها؟

الموضوع اللي فات

قرية في المنوفية عزمت "قطر" كامل على الفطار

ليه البنات مابيفهموش في الكورة

كيف بدأت جملة "ارجعي للمطبخ"
صحفي مصري. مُدمن كورة، بحب الثورة وليفربول، وبكره مانشيستر يونايتد

لو عديت العنوان المكتوب على 40 مليون راجل، منهم 39 هيقولولك اه طبعًا البنات مابيفهموش في الكورة، وغالبًا ال40 كلهم هيكونوا مقتنعين إن البنات مابيفهموش أصلًا، بس بعيدا عن المشاكل الذكورية، ليه الرجالة بيشوفوا الستات مابيفهموش في الكورة؟ قبل ما تجاوب من وجهة نظرك، لازم تسأل سؤال تاني مهم: ليه البنات مفروض يفهموا في الكورة؟ أنا مابفهمش في الباليه المائي ولا في الرقص الإيقاعي ولا في طريقة عمل "الوايت صوص"، في حاجات كتير مابفهمهاش، وفي حاجات كتير البنات مابتفهمهاش، فليه مسألة الكورة بالذات بنعتبرها سبة أو شتيمة؟ اه يا عم مابيفهموش في الكورة، إيه المشكلة؟ مزعل نفسك ليه؟ مين قال إنهم لازم يفهموا فيها؟

بس إذا كنا قولنا إن مش لازم البنت تفهم في الكورة، فبلاش الشطحات النسوية ومحاولة إثبات إن الست "عافية" بتفهم في كل حاجة وتعرف عن الكورة أكتر من المرحوم "يوهان كرويف"؛ ادونا فرصة ندافع عنكم مش كدة. نرجع لموضوعنا، لكل قاعدة استثناءات، في موضوع الكورة ده تقريبًا ماشوفتش استثناءات، وماشوفتش بنت بتتعامل مع حتة الجلد المدورة دي بنفس جدية تعامل الرجالة معاها، وده اللي بيخلي الستات بالنسبالنا كمشجعين كورة، مابيفهموش في الكورة. ظاهرة الستات في مدرجات الكورة اتبلورت في مصر مع بطولة أفريقيا 2006، وطبعًا ماننساش مخرجنا دائم الإبداع محمد نصر، المتخصص في إنه بيثبت كاميرا لبنت حلوة قاعدة في المدرجات ويفضل يزووم عليها.

مؤخرًا بقى عندنا جيل من المشجعات، الرجالة شايفينهم بيهددوا مفهوم الكورة اللي احنا بنحبه وعارفينه، الكورة اللي كلها جري وعرق وتخبيط وبتقوم بسببها حروب وناس تموت وناس ضغطها يعلى. الكورة بتاعتهم مايعة كدة بتهتم بقصة شعر عماد متعب وعيون حسام غالي وحلاوة رمضان صبحي وحاجات تموع النفس. أعتقد إن الجيل ده من المشجعات لو كان موجود كان "أحمد صلاح حسني" استمر في الملاعب كام سنة كمان، ونجم الزمالك "سيد مسعد" كان بقى أسطورة. حسام غالي تحديدًا مبطل كورة بقاله سنتين بالميت، بس مظاهرات الحب هي اللي مقعداه في الملعب لغاية دلوقتي، بس عادي وماله!

في بنات كمان بيمارسوا كورة وليهم مسابقات عالمية ودوريات، بس لو أنت بتحب الكورة  واتفرجت على ماتش نسائي هتحس إن حد فاتح الكاميرا على وضع "سلو موشن". الكورة النسائية في مصر موجودة بقالها سنين، كانت سبوبة حلوة لسيدات بعينهم في اتحاد الكورة، وحاجة مالهاش أي تلاتين لازمة خالص، وإن كان طبعًا من حق أي حد يمارس أي رياضة بيحبها، لكن المقصود إني كمشجع وبحب اتفرج على كورة، عمري ما هنجذب للفرجة على ماتش سيدات. بعيدًا عن الفرجة والممارسة، في المحللات، اللي هما بيحللوا الماتشات، وده أسوء نوع من أنواع الستات اللي مابيفهموش كورة. مش لازم كل الناس تكون بتعرف تتكلم في الفنيات أصلا ويكونوا فاهمين فلسفة "جوارديولا"  والضغط العالي اللي بيطبقه "كلوب" والخطة اللي اعتمد عليها "رانييري" علشان ياخد الدوري بليستر. مش لازم خالص، بس لما تتطوعي وتقرري إنك بتفهمي وهتحللي ماتشات فأنا هضطر أقيمك زي ما بقيم أي محلل، والشهادة لله عمري ما شوفت ست بتعرف تحلل كورة.

قناة النيل للرياضة كانت ليها تجربة سيئة الذكر، إنهم يخلوا مقدمة الاستديو التحليلي هي كابتن "هناء حمزة" اللي هي أصلا كانت أسطورة في الكرة الطايرة، فليه؟ إيه مقوماتها يعني؟ النموذج الأسوأ لما قناة فضائية حبت تعمل ستديو تحليلي كله بنات؛ الحلقة كان بيتقال فيها مساخر، لدرجة إنهم مش عارفين الملعب فيه 11 ولا 12! ليه كدة يا بنت الناس؟ ما تقعدي في بيتك واتفرجي على ماتشات وشجعي براحتك من غير فتي ولت وعجن؟ ويوم ما تحبي تلتي وتعجبني تعملي ده على الشاشة؟ ما تلتي وتعجني على فيسبوك وكفاية، حبكت تطلعي هوا! بس البنات اللي طلعوا هوا يقدموا نشرات أخبار رياضية كانت الناس متقبلاهم أكتر، أشهرهم "شيماء صابر"، أهم على الأقل مابيفتوش، بيقروا المكتوب وكفى الله المؤمنين شر القتال.

الكورة بالنسبالنا هتفضل لعبة ذكورية بحتة، فيها عرق وجري وخناق وحروب أحيانًا، مش لازم تفهمي ده بس مش لازم تفتي فيه. اللاعب الكويس هو اللي بيلعب كويس، مش هو اللي شعره حلو ودقنه مساوية. لو قعدتي تشوفي ماتش جنب راجل، التزمي الهدوء، أو قومي ماتتفرجيش وتزاولي نفسك، ده مش ذنب عليكي ومش حاجة مهمة بالنسبالك. لو شايفة إن الولاد تافهين فأثناء ما الماتش شغال هما مش شايفينك أصلًا. لو حابه تهتمي بالكورة لأي سبب، يكفي تقعدي تتفرجي وتشجعي اللعبة الحلوة أو تشجعي نادي معين يعجبك. بلاش الشطحات بتاعت حكم مرتشي وظلم وحرام وكل الكلام العجيب ده، الكورة اتقطعت في نص الملعب، حكم إيه اللي مرتشي؟! صورة الموضوع هي لملكة جمال كرواتيا وبتعمل فري ستايل بالكورة وبتنطق الكورة وهي لابسة بيكيني وبتدرب فرق، حاجات كلها مفطرات بعيد عنك، وده مش هيخليها بتفهم في الكورة برضه

الموضوع اللي جاي

محمد رمضان: فنان حقيقى و لا أسطورة شعبية هتروح لحالها؟

الموضوع اللي فات

قرية في المنوفية عزمت "قطر" كامل على الفطار
Home
Home
خروجات النهاردة
بوفيه هندي @ ميراج كافيه
أكل
12/16/2017
12:00pm - 12:0am
JW Marriott Hotel Cairo
 ساعة الحظ @ Sherlock Holmes Pub
بارات
12/16/2017
6:00pm - 8:00pm
Ramses Hilton Hotel
غداء عمل @ مطعم مهراجا الهندي
أكل
12/16/2017
12:00pm - 12:0am
Ramses Hilton Hotel
تخت شرقي @ الكبابجي
أكل
12/16/2017
7:30pm - 11:00pm
Sofitel El Gezirah Hotel
برياني @ مهراجا
منوعات
12/16/2017
4:00pm - 7:00pm
Ramses Hilton Hotel
تخت شرقي @ La Palmeraie
أكل
12/16/2017
7:30pm - 11:00pm
Sofitel El Gezirah Hotel
قضي يوم @ سوفيتيل الجزيرة
منوعات
12/16/2017
12:00pm - 12:0am
Sofitel El Gezirah Hotel
Home
Home